شهادتى لما يحدث ف التحرير

دى شهادتى لما يحدث ف الميدان ايام الثلاثاء والاربعاء 22 و 23 نوفمبر

اول حاجه لازم اقولها ان وعهد الله احنا احسن شعب ف الوجود ...
الناس اللى ف الميدان دى منزلتش عشان اى قوى سياسيه فاسده قالتلهم انزلوا ,الناس دى نزلت من تلقاء نفسها والعدد بيوصل من مليون ل اتنين مليون من غير  حشد لاى جهه ...
الناس دى نزلت لانها رفضت اننا نتذل تانى ,أبت الا ان تكون حرمة الدم المصرى هى أولويتنا !
الاحداث اللى بتشوفوها ع القنوات مش تيجى حاجه ف اللى بيحصل ع ارض الواقع ..
ش محمد محمود مبيهداش 10 دقايق ع بعض , ضرب بالقنابل والرصاص والخرطوش
عشان العيسوى بيه اللى بيقول مفيش خرطوش اسألوا الناس احنا كنا ماشيين نلم الرصاص المطاطى والخرطوش من ع الارض
المشهد ف الميدان كالتالى :-
الميدان من الداخل يعج بالمتظاهرين والمعتصمين وهادى الى حد ما , هناك هتافات ف كل ارجاء الميدان تندد بقتل الشهداء وما يحدث ف ش محمد محمود وتطلب برحيل المجلس العسكرى بكل اعضاؤه ليس المشير وحده ..
اما ش محمد محمود مسرح المواجهات , لا يهدأ كما قلت 10 دقايق متصله ,هناك ضرب من جهه الشرطه , ولازم نتواجد ف هذا الشارع للاسباب التاليه 1-وزارة الداخله موجوده ف شارع منصور وهو شارع متفرع من ش محمد محمود .
2-احنا مش غاويين نموت او نفقد عيوننا   لكن لما عملنا تهدئه وانسحبنا من الشارع يوم السبت والاحد فوجئنا بالامن يضربنا داخل الميدان بالقنابل والرصاص الحى والمطاطى وانتو شفتوا بنفسكوا منظر الجثث وهى ف الزباله ..
3-بعد كده عملنا اكتر من 4 هدنات مع الامن وفى كل مرة الامن هو اللى بيخرق الهدنه ويضربنا , هما بيعملوا هدنه عشان يرتبوا صفوفهم ويجيلهم امداد ذخيرة وسلاح ويرجعوا يقتلونا تانى ..
4-من الاخر التواجد ف ش محمد محمود لمنع وصول الامن الى داخل الميدان وكل مرة ناس من الوزارة تقنعنا بالهدنه ونرجع نلاقى الضرب اشتغل تانى لكن مفيش اى نيه لدينا لاقتحام مقر الوزارة ..

http://www.youtube.com/watch?feature=player_embedded&v=IiTUlRTtLP0

فى شباب رجاله بموتوسكلاتهم مش عارف من غيرهم كنا هنعمل ايه ! دول شغلتهم ينقلوا المصابين من داخل مسرح المواجهات لمستشفيات الميدان المختلفه
فى سيارات اسعاف متواجده ف الميدان باستمرار
القنابل السى ار دى غريبه جدا ومينفعش معاها لا خل ولا بيبسى بنستعمل بيكوجل وفحم وخميرة وده منتشر اوى بين المتظاهرين وف المستشفى لكن الاغرب ان فى غاز اضرب علينا بدون لون او ريحه بيسبب احتراق ف العين وشلل ,واحد صاحبى جاله تيتانى منه ,وحصله شلل لفترة قصيره والغاز ده بينتشر بسرعه رهيبه
المستشفيات متوفر بها الادويه ومؤن الاعاشه لكن بيكون فى عجز فى بعض التخصصات زى الرمد والعظام , اوقات بتواجد ف المستشفيات للمساعده , من كتر اصابات العين باتحسس عيونى واحمد ربنا انهم لسه موجودين مكانهم ...
مفيش اى لافتات حزبيه بتترفع ف الميدان
شباب وناس من مختلف التوجهات , يوم التلات بالليل لقيت اتنين كبار ف السن ويبدوا عليهم الوقار وواقفين يتكلموا ,واحد منهم قال للتانى : الحمد لله اننا نزلنا ,احسن من قعدتنا قدام التلفزيون واحنا بنسمع 30 واحد بيلفوا ع جميع القنوات وشغالين كدب علينا ..

متصدقوش اى حد الا اللى ف الميدان فقط ومتلوموش الاخوان بس ,رغم انى عمرى ما هسامحهم وانهم شاركوا بشكل او باخر ف اللى بيحصل ف الميدان لكن جميع الاحزاب والجماعات السياسيه باعتنا وتخلت عننا من اول السلفيين لحد العلمانيين , دول قوى همها تقسم الكعكه وتاخد كراسى وخلاص لكن لما نموت ونتسحل ونتيتم ميسألوش فينا

متصدقوش اللى يقولك الزم بيتك دول عاوزينها فوضى , بنزولك هتنظم انت الفوضى دى , لو فى حريق ف بيتك او بيت جارك تسيبها وتروح تصلى ولا تطفى ؟؟
معادتش ينفع الرجوع للخلف لكن ف نفس الوقت لازم ننظم خروجنا , بلاش نحولها لمواجهات دلوقتى , الاخوان لازم نحاسبهم على انهم باعونا بس بلاش دلوقتى ومش الاخوان بس كل اللى باعونا ..
الاهم اننا نوعى الشارع من خلال توعية الدايرة اللى حوليك لان ف غسل مخ اعلامى دلوقتى , العسكر عاوزنها مواجهه اعلاميه اكتر منها مواجهه امنيه
والعسكر صدرولنا الشرطه بحيث هم ميظهروش ف الصورة لكن ايديهم ملطخه بكل نقطة دم سالت , المسؤل دايما هو الرئيس لانه هو من اتى بهؤلاء الخونه
والعسكر عاوزين يعملوا مستشفى ميدانى دلوقتى؟!! بعد ما الناس ماتت , احنا هنعالج نفسنا بنفسنا , اللى ايده ملطخه بدمنا ميعالجناش ..
انا شفت حالات فقد عيون كتير وناس ماتت جنبنا وناس حصلها اصاببات كبيره قد تكون مستديمه , لازم ننزل ولازم يرحل ..


المطالب :-ا1- رحيل المجلس العسكرى من سدة الحكم السياسى اما قيادة الجيش احنا متكلمناش فيها , دى هنسيبها لمجلس الشعب المنتخب او الرئيس المنتخب القادم
2-تشكيل حكومة انقاذ وطنى بروح الميدان وان جميع وزراءها يكون لديهم الحس الثورى الميدانى وهناك خياران (ام رئيس الحكومه يجمع بين صلاحيات رئيس الجمهوريه ورئاسة الوزرا أو تشكيل مجلس رئاسى مدنى)
3-محاكمة كل المسؤلين عن المجازر التى حدث خلال الايام الماضيه ف التحرير وف جميع محافظات مصر .

لن نقبل باي عضو ف المجلس العسكرى لا طنطاوى بتاع مبارك ولا عنان المتأمرك
انتوا عارفين اد ايه انا باحترم حازم ابو اسماعيل لكن بلاش تسمعوله دلوقتى , انا كنت واقف جنبه ف الميدان وخلانى اشد ف شعرى , هو لا عاوز مجلس رئاسى ولا انتقالى ولا حكومة انقاذ ,وكل شويه يقولك هنقولكوا قرار بعد 24 ساعه قرار هام وعدى 4 ايام ولسه قرار البيه مخرجش !!!!

متخافوش ع تأجيل الانتخابات , مفيش حد من اللى فى الميدان طالب بتأجيلها , لكن وحتى لو اتأجلت ! انتو هتثقوا ف الاحزاب والقوى الاستغلاليه دى تانى؟!! دول سابونا بنموت ولا حد فيهم سأل فينا . بالعكس طلع احمد ابو بركه بتاع الاخوان يحرض علينا ويقول ان اللى ف الميدان دول خارجين ع القانون وكانوا بيعارضونا لولا ضغط الناس وشبابهم مكنوش خدوا موقف تانى , صحيح انهم لسه متامرين لكن ع الاقل مش ضدنا زى اول ايام السبت والاحد والاتنين

ليا صحاب اخوان هناك وشباب الاخوان هناك لكن جماعة الاخوان نفسها وقيادات حزبهم اللى انتو هتدوهم صوتكوا تامروا ضدنا وسبونا نموت
وكذلك القوى الليبراليه محدش فيهم نزل معانا , لكن ع الاقل محرضوش علينا زى الاخوان ما عملوا ..

من عادتى الا يأتينى نوم خارج سرير غرفتى ,وقد كسرت هذه العاده فأنا اهنأ بأطيب نوم وانا افترش أرض التحرير ..

شاركونا بنزولك ف الميدان او الاهم نزولك ف محافظتك لاننا محتاجين الرساله ف كل محافظات مصر لكن لو هتنزلوا ابعدوا بعيد مديريات الامن او بدعاءكم لينا ...
والنصر قادم لا محاله , حفظ الله مصر وحفظ شعبها ...