شهادتى لما يحدث ف التحرير

دى شهادتى لما يحدث ف الميدان ايام الثلاثاء والاربعاء 22 و 23 نوفمبر

اول حاجه لازم اقولها ان وعهد الله احنا احسن شعب ف الوجود ...
الناس اللى ف الميدان دى منزلتش عشان اى قوى سياسيه فاسده قالتلهم انزلوا ,الناس دى نزلت من تلقاء نفسها والعدد بيوصل من مليون ل اتنين مليون من غير  حشد لاى جهه ...
الناس دى نزلت لانها رفضت اننا نتذل تانى ,أبت الا ان تكون حرمة الدم المصرى هى أولويتنا !
الاحداث اللى بتشوفوها ع القنوات مش تيجى حاجه ف اللى بيحصل ع ارض الواقع ..
ش محمد محمود مبيهداش 10 دقايق ع بعض , ضرب بالقنابل والرصاص والخرطوش
عشان العيسوى بيه اللى بيقول مفيش خرطوش اسألوا الناس احنا كنا ماشيين نلم الرصاص المطاطى والخرطوش من ع الارض
المشهد ف الميدان كالتالى :-
الميدان من الداخل يعج بالمتظاهرين والمعتصمين وهادى الى حد ما , هناك هتافات ف كل ارجاء الميدان تندد بقتل الشهداء وما يحدث ف ش محمد محمود وتطلب برحيل المجلس العسكرى بكل اعضاؤه ليس المشير وحده ..
اما ش محمد محمود مسرح المواجهات , لا يهدأ كما قلت 10 دقايق متصله ,هناك ضرب من جهه الشرطه , ولازم نتواجد ف هذا الشارع للاسباب التاليه 1-وزارة الداخله موجوده ف شارع منصور وهو شارع متفرع من ش محمد محمود .
2-احنا مش غاويين نموت او نفقد عيوننا   لكن لما عملنا تهدئه وانسحبنا من الشارع يوم السبت والاحد فوجئنا بالامن يضربنا داخل الميدان بالقنابل والرصاص الحى والمطاطى وانتو شفتوا بنفسكوا منظر الجثث وهى ف الزباله ..
3-بعد كده عملنا اكتر من 4 هدنات مع الامن وفى كل مرة الامن هو اللى بيخرق الهدنه ويضربنا , هما بيعملوا هدنه عشان يرتبوا صفوفهم ويجيلهم امداد ذخيرة وسلاح ويرجعوا يقتلونا تانى ..
4-من الاخر التواجد ف ش محمد محمود لمنع وصول الامن الى داخل الميدان وكل مرة ناس من الوزارة تقنعنا بالهدنه ونرجع نلاقى الضرب اشتغل تانى لكن مفيش اى نيه لدينا لاقتحام مقر الوزارة ..

احداث السبت 19 نوفمبر

مش هينفع نتكلم كتير ! اليكم ما حدث وما يحدث وما يجب ان يحدث
مليونية 18 نوفمبر دعا اليها الاسلاميون واولهم حازم صلاح ابو اسماعيل قبل العيد وتم الحشد لها ,نزل الاسلاميين كلهم وبعض الليبراليين(مش كلهم) ويساريين وجميع النشطاء وكلنا ايدناها لان مطلبنا الرئيسى كان تسليم السلطه ,,لكن العسكر بدهاءهم الظالم قدروا يقلبوا المليونيه والمطلب حولين وثيقة السلمى , وقولنا ان الوثيقه هتسقط لو العسكر غاروا ف ستين داهيه , ابو اسماعيل خلى بينا وخلف وعده ومشى ومعتصمش مع انه كان وعدنا بالاعتصام , فى مجموعه من الشباب الورد(مكنتش معهم) قرر انه يعتصم وف صباح اليوم التانى السبت حصل ما حصل

عوده الندله :
الشرطه عادت زى يوم 25 بالظبط وافتكرت انها هتقدر ع المعتصمين ضرب وسحل بالهروات والقنابل المسيله ورصاص مطاطى والقنابل المسيله كانت غير بتاعة يوم 28 يناير بتحرق الوش وتخليك تدوخ متكلفه ف امريكا (هى دى المعون) ما علينا المتظاهرين اتغاظوا وواجهوا الشرطه والشرطه مقدرتش امام صمود الرجاله وتزايد الاعداد وكتير نزلوا بالليل (مساء السبت) ابو اسماعيل حب يصحح غلطته لغى درسه المعتاد ونزل التحرير وسلفيى كوستا ووفى تواجد اخوانى خفيف ومعظم الميدان كانوا من شباب 25 اللى ملهمش خلفية ايدلوجيه معينه , الشرطه انسحبت تقريبا الساعه 7.5 بعد ما بهدلت اللى ف الميدان لكنها ظلت موجوده ف شارع محمد محمود المؤدى لوزارة الداخليه ,, الناس فضلت ف الميدان , العدد بالليل كان عشرات الاف بدأ يقل مع ساعات الصبح الاولى وبدأ يزيد بعد الساعه 11 ص النهارده
الشرطه حتى الان بتضرب ناحية محمد محمود

قراءة الاحداث :
بحاول افهم بعض تصريحات النخبه الفاسده عن ان المسؤل عن الاحداث دى الاسلاميين بعد جمعة الامس لكن لقيتنى بقول لنفسى : يعنى انت كنت فهمت تصريحات الاسلاميين بعد احداث السفاره ف مساء مليونية الليرباليين ومعركة الشواكيش؟؟؟!!!!
ناس خايفه ان الانتخابات تتأجل ؟!! ده يوم المنى لكن مش هيحصل, العسكر مش بالغباء اللى يخليهم يأجلوا الانتخابات , الانتخابات لو اتأجلت مصر كلها هتتوحد ايد وحده ونرجع زى زمان زى 11 فبراير ونتوحد ع العسكر ستين كلب ونروح ف صراع الاعوده وهو نتيجته سلطة مدنيه خاليه من تدخل سياسى للعسكر
اهم ما يجب ان نضعه ف اولوياتنا هو حصار ماسبير الان
العسكر لهم ذراعان الشرطه العسكريه وماسبيرو ,, ما نستطيع فعله هو حصار ماسبيرو وتشتييت للامن ف المحافظات ومليونيه واحده حول ماسبيرو تكفى
فاكرين ايام الثورة؟ الجيش ساب الميدان والمتحف وراح حمى ماسبيرو , وف الاخر ياريت تنزلوا الميدان وتاخدو معاكو كمامات ونضارات غطس وميكوجيل وخل ليكوا عشان تحموا نفسكم او لغيركم
الاعداد كل لما تبقى كتير ,الامن هيعجز انه يعمل حاجه ...

ويسقط يسقط حكم العسكر ....

ماهية الجدل حول مقال الاسوانى فى المصرى اليوم

هو ايه اللى جرى للناس؟!! الناس ليه مبتتقبلش الانتقاد؟؟ليه مصرين على عدم التصارح والتصالح مع الماضى؟
هادخل فى الموضوع مباشرة : مقال د,علاء الاسوانى فى المصرى اليوم
ممكن اعرف الراجل غلط فى ايه؟؟!!
بداية متفق تماما مع مجمل المقال الا انى ارى انه خانه التعبير اللفظى فى حادثة الفتنه فى عهد ذو النورين عثمان بن عفان رضى الله عنه
قبل ما ادخل فى التفاصيل عاوزين نعرف قاعده
عصر الخلفاء الراشدين(بما فيه عصر عمر بن عبدالعزيز) 31 عاما هو العصر الذهبى للاسلام
اما العصر الاموى والعباسى الاول والثانى هو العصر الذهبى للحضارة الاسلاميه
وفى فرق كبير جدا بين الاسلام وبين الحضارة الاسلاميه
فى فرق كبير جدا بين الاسلام وبين المسلمين وهما الاتنين عمرهم ما كانوا واحد,والا لما المسلمين تخلفوا حديثا كنا نقول الاسلام تخلف؟؟
ولكن عشان الاتنين مش واحد ,منقدرش نقول كده...
الحقائق اللى ساقها الاسوانى فى مقاله هى حقائق صحيحه وموثقه فى كتب التاريخ
انا قولت ان المسلمين فى العصور دى تقدموا فى كافة المجالات لكن مش بالضرورة انهم كانوا يمتثلون لمبادئ الاسلام السمحه التى سادت فى عصر الخلفاء الراشدين

عصر الخلفاء الراشدين الذى كان قريبا جدا من عصر نبى الاسلام (ص) وتعاليم السماء ما زالت قريبه منهم وكان الناس اشد تعلقا والتصاقا بتعاليم دينهم ,وكذلك كان جل الصحابه لا يزالون ع قيد الحياه ع عكس عصور الخلافه الامويه والعباسيه
انا مش عارف ارد ع ايه لان كل من رفض مقال الاسوانى رفضه فى مجمله ولم يبدى على اى شئ يرفض!!!
قرأت ردا ع مقال الاسوانى لاحدهم وتركز الرد على مدى نزاهة وطهارة معاويه بن ابى سفيان
اليس معاويه هذا هو من قاتل على ابن ابى طالب؟؟ونقل الخلافه من المدينه الى دمشق؟؟؟وهناك امثله اخرى مثل:-ا
عندما قتل معاويه بن ابى سفيان الصحابى الجليل حجر بن عدى عاتبته السيده عائشه قائله"اين ذهب عنك حلم ابى سفيان"-فاجاب قائلا "حين غاب عنى حلماء قومى امثالك"
وعندما مات عمار بن ياسر"ابن سميه" فى موقعة صفين ,التى صفا فيها الحكم لمعاويه,قيل له ان رسول الله(ص) قال لعمار "ويحك يا ابن سميه تقتلك الفئة الباغيه" فأجاب معاويه "انما قتله من ارسله" قال الامام على ابن ابى طالب تعليقا ع هذا الرد "فنحن قتلنا حمزة حين اخرجناه الى احد!!"
اليس معاوية هذا هو والد يزيد الذى قتل سيد شباب اهل الجنه الامام الحسين حفيد رسول الله(ص)
اليس يزيد بن معاويه هو من كلف مسلم بن عقبه بغزو المدينه المنورة لسبب بسيط وهو النقد الذى وجهه له ابن حنظله الغسيل عندما قال بعد زيارته ليزيد "وجدته يضرب بالطنابير,وتعزف عنده القيان,ويشرب الخمر,اما والله لو لم اجد الا بنى هذا لجالدته بهم"
استباح مسلم المدينه ثلاثة ايام قتل فيها الكثير من الصحابه,وحملت الكثير من نساء المدينه سبايا وجوارى ليزيد

هناك امثله كثيره جدا على عدم التزام معظم هؤلاء الخلفاء لتعاليم الاسلام ولم ينجو من ذلك الا من رحم ربى من بعض الخلفاء الورعين
كلنا نعلم قصة خلق القران وكيف كان الخليفه المامون سيقتل الامام احمد بن حنبل بل زج به الى السجن فى قضية خلق القران
كانت قصور الخلفاء مليئه بالخمر وكان مال المسلمين ينفق فى غير موضعه مثل انفاقه على الشعراء ممن يقولون مديحا فى خلفاءهم وكان ينفق ع الجوارى
وهناك قصة شهيرة عندما احب الخليفه يزيد بن عبدالملك بن مروان جارية تسمى حبابه وعشقها-كما روى الطبرى-واضاع الرعيه وترك الظهور للعامه فقيل له"اضعت امر المسلمين واحتجبت مع هذه الامه"
الحكايات كثيرة ومنها ما ذكرها الاسوانى فى مقاله

ولكن هل هذا ينفى الحضارة الاسلاميه فى هذه العصور؟؟؟؟

بالطبع لا ينفيها

ولكن ما ينادى برجوع هذه الازمنه على علتها يزج بنا الى الهاويه,,فهل من يعترض ع هذا المقال,هو نفسه من يعترض على نظام الاقتراع السرى العام المباشر فى اختيار الرئيس؟؟وهو من يعترض على تحديد مده محدده للرئيس؟؟
هل تودون رجلا يحكمنا تحت مسمى خليفه ثم يورث الخلافه لابنه ثم لحفيده ثم تأتى جماعه اخرى لتنتزع الحكم بالدم؟؟؟
لست ضد اتحاد المسلمين ,لكن يجب ان نتمهل وندرس ماضينا ونتصارح ونتصالح معه ,نأخذ منه ما يفيدنا ونترك له ما يضرنا
لا نريد كما قال الاسوانى ان يمتد تقديسنا للاسلام الى تقديس التاريخ
فهذه فنرة لها ما لها وعليها ما عليها
عندما سقطت الدوله الامويه فر مروان بن محمد الى بلاد النوبه فى مصر ومعه قليل من جيشه وكثير من الذهب والجوارى,علم ملك هذه البلاد بقدوم مروان بن محمد فذهب اليه وجلس ع الارض

فساله مروان لم تجلس ع الارض,رد عليه:ان الله قد من على بعلامه فى هذه الليله فحق الله على ان اتواضع له واجلس ع الارض ولكن قل لى ,لما تلبسون الحرير والديباج وهو محرم عليكم فى دينكم؟؟
اجاب مروان: هؤلاء قوم من العجم دخلوا فى ديننا وكانو قبل يلبسون الحرير ولم نستطع منعهم

ثم قال الملك: فلم تقطعون الزرع والحقل وتخربون البساتين وذلك محرم عليكم فى دينكم؟؟
اجاب مروان: الذين فعلوا ذلك عبيد واتباع لنا وكانوا معنا فى القتال وهم خربوا زروعكم دون امر منا

ثم قال الملك : فلم تشربون الخمر وهو محرم عليكم فى دينكم؟ فقال مروان: هؤلاء السفهاء منا :اجترأوا عليها وعاونهم فى ذلك العبيد واتباع العجم
عندئذ نكث الملك بعود فى يده وقال "قوم دخلوا فى ديننا"؟!! "عبيد واتباع لنا"؟!!"فعل ذلك السفهاء منا؟!!"
واخذ يكرر ذلك اكثر من مرة ثم قال " ليس ذلك كذلك ولكنكم تركتم تعاليم دينكم ونبيكم ,واستبدلتم دينكم بدنياكم , فاصابكم غضب من الله,ولسوف يصيبكم مرة اخرى ,واخشى ان ينزل بكم هذا الغضب وانتم فى ارضى,فتصيبنى معكم,ان حق الضيافة ثلاثة ايام فتزودوا ما شئتم وارتحلوا عن بلادى
يا جماعه كل اللى انا عاوزه منكم انكوا تحكموا عقولكم شويه,وتحكموا بالعلم والمعرفه والدلائل والقرائن ونستبعد العاطفه شويه

مقال الاسوانى مجبش حاجه من تاريخ ابوه,جاب كلامه ده من كتب التاريخ ومن اللى حصل فعلا

حادثة الفتنه فى عهد عثمان حصلت فعلا وفى مجموعه من المسلمين انذاك قالوا ان عثمان يعين اقربائه واصحابه وحدثت فتنه عظيمه ,التزم فيها عثمان بيته حتى دخلوا عليه وقتلوه

لا ابرر مقتل عثمان ع الاطلاق ولم يبرره الاسوانى ولا نجرؤ على ذلك,لكنها حدثت بالفعل وهى سبب مقتل عثمان ومن الواجب علينا ذكرها والا سنكون ممن يحرف التاريخ

انا كتبت ورديت ع المقال ده لان ده تاريخ مش سياسه ,ولازم نعترف بيه وننقده

وربنا يوفق الجميع ويهديهم ويهدينا الى سبيل الحق والرشاد

احداث التحرير يوم 27 مايو

انا والله العظيم لسه داخل البيت ,لسه راجع من ميدان التحرير,ميت من الجوع بس شوقى انى اوصفلكم اليوم كاتم اصوات عصافير معدتى

انا هكتب عن اليوم اللى انا عشته و(ما اعبد) لا لسه شوفت ولا خبر ميديا واحد عن اليوم ولا حتى فى حد قالى الميديا تناولته ازاى الا وانا فى الميدان سمعت حد بيقول ان الجزيرة بتهاجم الثوار ومعرفش صح ولا غلط
انا ممكن استفيض شويه فى وصف اليوم لكن هحاول اختصر ع قد ما اقدر وكمان هقولكوا ايه المطالب اللى اطلبت وسيرة الاخوان جت ازاى!!!

انا طبقت ليلة الجمعه ومنمتش وفكرت مروحش لكن حسيت انى لو منزلتش التحرير غيرى ممكن يكسل واليوم يبوظ, اتصلت ع الواد الثورجى احمد حمدى واتفقنا ننزل سوا

وصلنا الميدان تقريبا فى حدود 9.5 صباحا ,لقيت الثورجى صديقى الوفى بيقولى ما تيجى نروح,لولا خايف اخدش حياءكوا كنت قولتلكوا اللفظ اللى انا قولتهوله!!

اول ما وصلنا الميدان كان خالى من اى مواصلات وفيه اعداد قليله وفى ناس بتجهز الستيجز

كل دقيقه بتعدى العدد بيزيد وده كان له انظباع سئ ع الثورجى لانى قاعد اذل اللى جابوه طبعا

العدد قبل الجمعه كان كويس لكن مش الكبير اللى يطمن ,واول ما ادان الجمعه اتلافع  شوفت اعداد بتهل ع الميدان !! اعداد مهوله ,حسيت بنفس الفرحه اللى كنت باحس بيها وانا فى ايام ال18 يوم والاعداد كل ما تزيد كان كل ما قلبى يرفرف من الفرح

المهم الشيخ بدأ الخطبه وكانت جميله جدا لدرجة ان واحد صاحبى مسيحى اتعرفت عليه هناك ومجموعه من صحابه كانوا مبهورين بالخطبه وكل لما الخطيب يتكلم فى موضوع معين ميمسكوش نفسهم ويصقفوا ويهتفوا الله اكبر وكان فى عدد من المصليين بيرددوا معاهم

بدأت صلاة الجمعه بامامة الشيخ محمد جبريل ومش هوصفلكوا خشوعه فى الصلاة,لكن اكتر حاجه لفتت الانتباه دعاءه فى الصلا,والله العظيم جنبى كان فى ناس بتبكى من دعاءه

وصلينا العصر جمع تقديم وبعد كده صلاة الغائب على شهداء الامه العربيه عامة

وبعد كده حسيت ان ربنا بدأ يصب غضبه ع الثوار!!!!

الجو اتبدل 180 درجه ,الجو قبل الجمعه كان هو السبب ان الثورجى صاحبى ماسكلى يقولى يلا نروح,الجو حار حرارة الابل والشمس بتكوى

فى لحظات وبعد صلاة الجمعه عددت سحابه فوق الميدان وغممت عليه واشعة الشمس كأنها بتستحى وهى نازله ع الميدان وبعض قطرات المطر تحس انها بتغازل الثوار

جو مقدرش اوصفهولكوا والله العظيم مستمتعتش بجو فى حياتى زى النهارده بعد الجمعه

فتحت تويتر لقيت نوارة كاتبه ان العدد يزيد قليلا عن ربع مليون ,الكلام ده كان بعد صلاة الجمعه ع طول,حسيت انها مش دقيقه لان العدد كان كبير

لكن بعدها بساعه حسيت ان كلامها تقريبا كان صحيح لان العدد بعد صلاة الجمعه تضاعف 3 مرات العدد اللى موجود وقت الصلاه

انا حضرت معظم مليونيات التحرير خلال ال18 يوم وعندى المقدرة انى اقارن

العدد النهارده ميفرقش عن مليونيات ال18 يوم الا فى حاجه واحده

خلال مليونيات ال18 يوم الميدان كله بيكون ممتلئ عن اخرة من جميع النواحى

النهارده الميدان كان ممتلئ من جميع الاتجاهات الا الاتجاه الشرقى من عند المتحف المصرى من ناحية جامعة الدول

كان الجانب ده فيه ناس لكن الى حد ما قليل ,لان الناس اللى فيه اتنقلوا لجهة كوبرى قصر النيل وتركوه الى حد ما قليل الكثافه

بعد انبهارى باليوم الحال اتقلب,الثورجى بقى فجأه نشيط وانا فجأه عاوز اروح انام

قعدنا نهزر شويه مع بعض صحابنا وكنا عند قصر النيل وسمعنا صوت رامى عصام بيغنى

الثورجى اتنفض طبعا وروحنا عن الستيج اللى عند عمر مكرم عشان نلاقى رامى عصام بيفنش اغنيته وبعدها عمرو حمزاوى اتكلم وزكريا عبدالعزيز وكريمه الحفناوى وبعض مصابى الثوره وشباب الثورة اتكلموا

والستيجز التانيه كانت شغاله وعليها اقبال لكن احنا فضلنا الستيج بتاعة رامى عصام

بدأ رامى عصام يغنى تانى وكلنا عارفين انه من معتقلى 9 مارس والكل اتفاعل معاه و فجأه نلاقى الاقبال ع الستيج مهول

ورامى بيغنى كلها اغانى اسقاط سياسى ع مبارك :دبورة وشورت وكاب,الجحش قال للحمار,واحد اتنين الجيش العربى فين

رامى عاوز ينزل والناس مش راضيه ابدا تنزله

وبين كل اغنيه فى حد بيتكلم

نيجى للمهم

المطالب اللى اترفعت

معظمها مطالب الاجماع الوطنى اللى اتفقنا عليها زى تعجيل محاكمة المخلوع ومحاسبة الفاسدين واعادة النظر فى حركة المحافظين واصدار القوانين والانفلات الامنى والاقتصاد والفتنه الطائفيه والقضاء عليها

مش هنكر ان فى مطالب زى مجلس رئاسى و دستور الاول ,المطالب دى اترفع لكن لم يعيرها احد اهتمام

لكن المطلب اللى الكل اهتم بيه واتطلب بشده هو تأجيل الانتخابات لعدم تهيئة ظروف البلاد الامنيه او الاقتصاديه لمثل هذه الاجراءات الصعبه الازمه للعمليه الانتخابيه

حاجه مهمه : سيرة الاخوان المسلمين

بالتأكيد سيرتهم جت وكتير اوى اتكلم عنهم لكن للامانه لازم افصل

عموم المتظاهرين هتفوا هتاف وحيد مفيش غيره,,الاخوان فين ,,الميدان اهو

اما النخبه السياسيه اكدت انها تحترم راى الاخوان فى عدم النزول ولكنها تستغرب من نبرات التخوين التى ظهرت فى بيانها

والله العظيم تلاته مسمعتش حد من النخب عاب فى الاخوان الا فى استنكار البيان بتاعهم عن جمعة 27

وفى كتير اوى قالوا يا جماعه انتوا بتتكلموا عن الاخوان ليه؟؟ انتو كده بتزودوا حجمهم!! هم على راحتهم يشاركوا او ميشاركوش

يومنا نجح وبلاش نجيب سيرتهم من قريب او من بعيد

لكن الحديث عن الاخوان فى الميدان النهارده لم يتجاوز اكتر من 3% من الحديث ويمكن اقل كمان

لسه معرفتش موقف الاعلام من اليوم ايه ولا موقف المجلس العسكرى ايه ولا حتى الاخوان

لكن اعتقد انه يوم ناجح جدا بالنسبه لمن دعى اليه لان كان فى حشد غير مسبوق

وكمان ناجح للاخوان وللشعب عامة عشان عمليات الفساد اللى بتحصل دى تبطل والمجلس العسكرى يعرف ان فى ناس ممكن تحاسبه

ودمتم............. لحد ما اشوف موقف الاعلام من اليوم ايه!!!

اول القصيده كفر,,اتاخدوا ع خوانه!!

اول القصيده كفر
اللى قال( نازل التحرير عشان محستش بالتغيير) ده بيستهبل لاء حصل تغيير
ايام مبارك كان الواحد ع الاقل عارف انه هيتقبض عليه لكن دلوقتى بياخدونا ع خوانه
هو ايه اللى بيحصل؟؟ الشرطه العسكريه بتقبض ع النشطاء السياسيين قبل جمعة ضد الفساد ليه؟؟
قبضوا ع ابراهيم عابد و جنزير وعايده الكاشف ومحمد فهمى وعبدالرحمن امين ونشطاء اخرين من 6 ابريل
قبضوا عليهم لانهم بوزعوا ورق يقولوا للناس هننزل بكرة ليه,بعد التشويه اللى حصلهم لازم يوضحوا هم نازلين ليه
الورق اللى اتوزع مفهوش مجلس رئاسى ولا دستور وحتى لو افترضنا انه فيه الكلام ده,هم مش من حقهم يعبروا عن رايهم؟؟؟
طب الاخوان ما هم بيوزعوا ورق عشان يحشدوا لعدم النزول...مبيتقبضش عليهم ليه؟ اه ليه؟؟
اتقبض ع النشطاء دول لان صبحى خروع قدم بلاغ فيهم امبارح ع الهوا,فى برنامج ملايين بيتفرجوا عليه؟؟
احنا مش خلاص خلصنا من بلاغات احمد عز دى ولا ايه؟؟
مش عاوز تنزل متنزلش يا اخى لكن متحشدش لعدم النزول وتخون الناس اللى نازله وتقولهم كلام مقالهوش
دى اسمها وقاحه وقلة ادب
وشغالين الله ينور ضحك ع عقول الناس,,اتقوا ربنا اللى انتو واهمين نفسكوا انكو بتتكلموا باسمه
الناس نازله بكرة سلميه سلميه سلميه ومش هيسمحوا لاى حد انه يستخدم عنف
واى حد مندس هيعمل اى فتنه بينهم او يستخدم العنف هيظبطوه
والله العظيم تلاته الناس اللى بترمى الناس بالباطل دى ربنا ما هيسامحها ابدا
بلاغات بلاغات بلاغات بلاغات ايه مفيش ابدا بلاعات تترمى فيها البلاغات دى
هو مش اعضاء فى الحكومه والمجلس العسكرى قالوا انهم بيرحبوا بمظاهرات التحرير كل جمعه؟؟؟
اشمعنى الجمعادى الناس تتاخد ع خوانه؟؟وحتى لو لهم رأى زى الزفت تخونهم وتدخل فى نواياهم ليه
والله كأنى باسمع تامر بتاع غمرة لتانى مرة : يوم الغضب! يوم الغضب من مين؟! يوم الخلاص! يوم الخلاص من مين؟!!
سيناريو 52 بيتكرر والاخوان لابسين دور الحلزونه,,بس متندموش لما تلبسوا فى الاخر
أهم بدءوا تحقيقات مع قنوات فضائيه الحياه ودريم وان تى فى و المحور بسبب اثارة الفتنه
تحقيقات مع اعلام لانه بيقول الحقيقه لانه قال ان فى فى ناس بتدعو لمليونيه جمعه جديده
هى الجمع اللى فاتت محصلش فيها مليونيات ولا ايه؟؟
ولا هى سياسه خليهم يتسلو رجعت تانى؟؟
والله نتنياهو معاه حق,قال احنا عندنا ديمقراطيه,,اليهود عندهم وعشان كده العالم كله بيساعدوهم ومعاهم حق
يساندوا دول دكتاتوريه بتفرض اراءها ع غيرها ليه؟ ليه؟؟

جائزة مائة ناقه لثوار ميدان التحرير

نداء الى كل عملاءنا

من يجد الفتى المدلل السيس الخارج عن دين اباءنا واجدادنا اللى نازل يوم 27؟
من يجده يأتى به حيا او ميتا

وله جائزة قيمه : خاوزء من طراز اف بى

..............
خلاص يا ساده,اللى نزل يوم 25 كانوا قله مندسه واجنداتهم حمرا لكن اللى هينزل يوم 27 فقد صبأ عن ديننا
مع ان نفس الكلام اتقال عن اللى نزلوا يوم 25 انهم خارجين عن الحاكم بردو لكن العجيب ان جزء من اللى منزلوش يوم 25 (لكن نزلوا بعد ما اتأكدوا انها ثورة) بدءوا يخونوا اى حد يخالفهم الرأى

اسباب النزول يوم 27 مايو اتقالت ومعروفه ومفهاش مجلس رئاسى ولا دستور الاول

ومع ذلك قيادات الاخوان تقولك دول نازلين يشتموا المشير؟؟؟؟؟؟
احنا من حقنا ننتقد المجلس العسكرى بصفته الرئاسيه وانا مع المجلس الرئاسى وبشده لكن طالما مش مطلب اجماع وطنى قولنا نشيله من المطالب

واللى بيتفزلكوا ع عقول الناس ويقولولك ان المجلس الرئاسى ده التفاف ع الاستفتاء؟؟اللى يقولك كده تف فى وشه

هو سيرة المجلس الرئاسى جت من قريب او من بعيد فى الاستفتاء؟؟؟؟ المجلس العسكرى اتفرض عليك يا بيه ,انت لم تستفتى عليه

ومع ذلك مش هنطالب بيه لانه مش مطلب اجماع وطنى

واللى يقولك عاوزين دستور الاول ,ده متفش عليه؟ ده تولع فيه,لان ده التفاف ع الاستفتاء والمطلب ده عشان يتحقق لازم استفتاء جديد او اجماع وطنى(كامل) عليه

هننزل يوم 27 مايو عشان مطالب هحطهالكوا فى اخر المدونه ولو متحققتش يبقى مفيش حل غير اننا نضغط ولو المجلس منفذش يبقى يمشى

ومحاولة شق الصفوف اللى بتتعمل دى محاوله قلة ادب, مش عاوز تنزل متنزلش لكن متدعيش لعدم النزول وتخون كل اللى ينزل

موقف المواقع السلفيه مش غريب لانهم بيحرموا المظاهرات عموما لكن موقف الاخوان واصرارهم ع شق الصفوف ,ده موقف هيتعايروا عليه

الاخوان بيدلعوا المجلس العسكرى؟؟نصيحه مدلعوش حد,ده بيستخدمكوا دلوقتى مش أكتر ,مدلعش حد من اول صاحبك لحد مجلسك العسكرى

هنعمل حملة لا للدلع, ادلعى يا عوجه فى السنه السوده

واللى يفقعلك مرارتك ان الاخوان يطلعوا بيان يشقوا فيه الصفوف وتلاقى مجموعه تانيه منم قيادات الاخوان اللى مش فى مكتب الارشاد وبعض شباب الاخوان هينزلوا, البقرة بتولد والتور بيحزق,سألوه ليه؟ قالهم تحميل جمايل

ليه الاخوان بلعبوا لعبة شد الحبل من النص؟؟ معرفتوش ان اللعبه دى زى الدبه اللى كلت صاحبها

والناس اللى نازله تقول دستور الاول دى! خليكوا ماشيين ورا تهانى كوارع وفريده شباشب لحد ما يودوكوا فى داهيه!! ده التفاف ع الديمقراطيه يا بيبيز

اما صبحى خروع وكلامه انه لا يعترف باى مسلم غير اخوانى ,فده كلمه واحده (خروع) ويقولك نازلين يشتموا المشير؟؟ مشير مين يا صبحى,شد اللحاف يا صبحى
نفسى الناس اللى بتتقمص دور الاله وتبدأ تحكم على مدى ايمان واسلام اشخاص اخرين ,نفسى يتبطوا,مين نصبكم متحدثيين رسميين باسم الرب او باسم الاسلام؟؟!!!

قولنا الثورة بتضيع ولو ملحقناش نتفادى انتكاستها كلنا هتروح فى البلاله واولنا الاخوان اللى اى حد دكتاتور هيحكم هيتمنى يكسرهم عشان عرف قوتهم

مش عاوز افقد ثقتى فى الاخوان ,لكن عرفت خبر ان اخوان اسكندريه وبعض شباب الاخوان هينزلوا يوم 27 يا رب يكون صحيح عشان منفقدش الثقه فيهم

مشفتوش خطاب نتناياهو؟؟ طب والله العظيم وانا بشوف الخطاب ده انا حسيت ان فى حد بيغتصبنى فى افكارى !!! قالك القدس لازم تبقى كلها داخل حدود اسرائيل لان اسرائيل ديمقراطيه وهتحترم جميع الاديان,اما العرب ديكتاتوريين ولا نأمنهم على مقدسات الاديان المحتلفه

معاه حق(فى عدم ديمقراطيتنا وليس اهليتنا للقدس) لاننا مش ديمقراطيين,اى حد يخالف رأيك يبقى كافر ,ملحد,غير واعى,امى جاهل مبيفهمش

احترموا عقول الناس

احنا نازلين ننتقد المجلس العسكرى بصفته الرئاسيه وليست العسكريه والله العظيم تلاته جيشنا وطنى جدا ولا يمكن يضرب رصاصه واحدة على اى مدنى

والمجلس العسكرى بصفته الرئاسيه شئ والجيش شئ تانى خالص لازم نحافظ على سلامة مؤسسه القوات المسلحه

والناس اللى هتنزل يوم 27 لازم تتغابى فى السلميه وتتغابى فى شعار الجيش والشعب ايد واحده

وشباب الاخوان احنا بنعول عليكوا يا رب متخذلوناش وتعملوا زى يوم 25 لما نزلتوا مع ان قياداتكم منزلوش,وبطلوا تاخدوا كلام اعمى من قيادتكوا وتضحكوش ع عقول الناس وتقولوا مجلس رئاسى ده التفاف؟؟قولوا انكوا مش عاوزينه لكن متقولوش ده التفاف

اما موضوع الدستور قولوا وانا معاكوا ان ده التفاف

كام رساله ع السريع كده

القوى الوطنيه المختلفه: البركه فى اللمه وكترة الايادى

المجلس العسكرى : قالوا يا فرعون مين فرعنك؟قال ملقتش اللى يردنى,,,,,,,,,لا للدلع

المتحذلقين باسم الدين : ايوه نريدها هلس هلس نريدها خرابا دائما,خمر وقمر رقص,رقص رقص شبابا ضائعا

شباب الثورة الحقيقين : جحا اولى بلحم توره ,انتوا اللى لازم تحافظوا ع ثورتكم ,مش اى حد تانى
س : ماذا نحن فاعلون اليوم يا ابن ابى ربيعه؟؟؟
ص : فاعلون بشأن من يا ابن نانسى؟؟؟

س :بشأن هذا الفتى المدلل السيس اللى خارج يوم 27

ص : (مستهزءا)من هذا الفتى؟؟؟

س :اذا فاليوم خمر ونساء,,وغدا نقتل الفتى

وداعا ونلتقى بكم فى جمعة اخرى ,جمعة الفجور
مطالب جمعة 27 :-ا

1. تقديم مبارك للمحاكمة بتهمة الخيانة العظمى، على اثر اعتراف المشير بإعطاء مبارك الامر للقوات المسلحة بقتل المتظاهرين
2. اشراف قضائي وحقوقي على جهاز الامن الوطني ومحاكمة كل الضباط المتورطين في قتل المتظاهرين وتعذيبهم
3. حل جهاز الامن المركزي او ادماجه في الجيش
4. اقالة يحيى الجمل ومحاكمة عمر سليمان
5. وضع حد ادنى واقصى للاجور واعادة توزيع الثروات لانقاذ البلاد من الازمة الاقتصادية والتحكم في الاسعار
6. فرض الضريبة التصاعدية
7. محاكمة كافة رجال الاعمال الفاسدين ومصادرة اموالهم
8. الغاء احالة المدنيين الى قضاء عسكري
9. اعادة محاكمة كل المحكوم عليهم باحكام عسكرية بعد تحويلهم الى المحاكم المدنية
10. حظر فض الاعتصامات بالقوة بشكل كامل

الى السلفيين والليبراليين والاخوان واليساريين أتحدث

الى السلفيين والليبراليين والاخوان واليساريين أتحدث

هو احنا كده"شعب تجمعنا كورة وتفرقنا عبير وكاميليا"

ألهى ما يهريلكوا كبد ولا يفقعلكوا مرارة ولا يرفرفلكوا قلب لترجعوا تتجمعوا وتتحدوا تانى

الثورة يا ساده نجحت انها تخلع لكن نسيت ان ممكن يحصلها انتكاسه

نص وزارة عصام شرف من وزارة شفيق وربعهم من ايام نظيف والباقى مفصولين من أحزابهم اللى المفروض اسمها معارضه

والله العظيم والله العظيم اللى فاكر ان الثورة نجحت يبقى بيشتغل نفسه

عمر الثورات مبيتعدش بالايام او الشهور,عمر الثورات بيتعد بالسنين لكن اللى ممكن نوصله بسرعه هو الاستقرار

احنا عاوزين استقرار عشان نبنى البلد ,عاوزين استقرار عشان نبدأ ثورة صناعيه وتكنولوجيه وثورة فى الصحه

والاستقرار ده مش هيجى فى ظل نظام بيصارع من اجل العوده

اذا كنا متفقين ان دى ثورة ومش مجرد انتفاضة او احتجاجات يبقى لازم من يدير البلاد يديرها بروح الثوره احنا شوفنا لما نبيل العربى جه من الثورة انجز فى اقل من شهرين اللى الخارجيه المصريه فى عهد المخلوع ما انجزتوش فى سنين لكن منصور العيسوى واشرف حاتم لانهم ماعندهمش روح الثورة حتى الان مش قادرين يعملوا شغلهم

الشيخ عتمان بيقول لبثينه كامل : انا عارف ان الشباب ده قبض بالدولار وامبارح طالع ع العربيه وبيقول ان اللى بيقود ثورة الغضب التانيه دى لهم اهداف تانيه بعيدة المنال

والحاج ممدوح شاهين بيقول ان الشعب فى الاستفتاء قال نعم للمجلس الاعلى للقوات المسلحه

وحملة توقيعات ال100 الف توقيع شغاله الله ينور

انتو نسيتوا ان دول متربيين على ايد مبارك؟! والايام اثبتت ان فكرهم زى اللى مربيهم

مش عاوز اتكلم كتير عن تجاوزات المجلس العسكرى لانى سبق وكتبت ع المدونه دى التجاوزات وبالتفصيل

لكن لازم أذكركوا من باب فذكر فان الذكرى تنفع المؤمنين: ان الجيش خط احمر لكن انتقاد المجلس الاعلى بصفته الرئاسيه وليست العسكرية أمر مشروع

نجحوا انهم يفرقونا فريق نعم للتعديلات وفريق لاء,,سلفيين وليبراليين,,,اخوان وعلمانيين,,,مسلمين ومسيحين,,فريق بياكل باميه وفريق بياكل كفته

ممكن نفوق بءا شويه؟؟؟ولا احنا خلاص اتعودنا ع النوم؟!! ولا اتعبنا 18 يوم ومن حقنا نرتاح وننام؟!!!

تناموا !! قوموا قامت عليكوا حيطه

الثورة بتتسرق والنظام البائد هيرجع ,,عاد لينتقم,,دلوقتى بينتقموا من الفقرا وسوائين الميكروباصات ,,بكره هينتقموا منكوا كلكم يساريين واخوان

الاخوان كانوا نايمين ايام احداث امبابه وعين شمس مجاملة لناس معينين ,,مش مهم, المهم انكوا تصحوا وتفوقوا بءا

النظام اللى فات اول ناس هينتقم منهم لو رجع هم الاخوان لانه ادرك قوتهم ومش هينفع يسيبهم اقويا ولا هيستخدمهم فزاعه للغرب بعد كده ويسيبهم اقويه وعلى رأى نوارة هيتذكروا فى كتب التاريخ بس

وكمان السلفيين ما شاء الله اول مرة نشوفهم بيعبروا عن رأيهم ودى حاجه كويسه لكن لازم تخرجوا يوم 27 تطالبوا بحريتكوا والا هتتكتموا تانى

والكلام للكل

مطالب يوم 27 مايو محدده وصريحه ومقلناش مجلس رئاسى فى الطلبات لاننا عارفين انه مش مطلب اجماع وطنى مع انى معاه وبشده

فرق ايه مجلس رئاسى فاهم وواعى وفيه شخصيات توافقيه عن مجلس عسكرى مبيفهموش غير فى لغة النار وبس, وبشهادة لواءات المجلس؟!!

ده هيحكم وده هيحكم ومفيش اى انتقاص لشرعية الاستفتاء لان الاستفتاء مجاش فيه سيرة المجلس العسكرى او الرئاسى,جه فى الاعلان اللى فيه 62 ماده لم يستفتى الشعب عليه

وبعدين مش المفروض املجلس العسكرى قال انه هيقعد 6 شهور طب احسبوا معايا  ثورة فى يناير وانتخابات مجلس شعب فى سبتمبر ولسه انتخابات شورى وانتخابات رئاسه يعنى باقل تقدير المجلس هيقعد لحد 2012 يبقى مجلس رئاسى منتخب من الشعب ولا مجلس عسكرى طمعان فى السلطه؟؟ او عاوز يرجع النظام السابق فى صورة شخصيات اخرى؟؟؟ عاوزين مرتضى منصور يحكمكم؟؟؟؟

عموما طالما مش مطلب اجماع وطنى يبقى نفكنا منه ونركز فى المطالب اللى كلنا متفقين عليها

لازم نرجع تانى كلمتنا كلمه واحده عاوزين تتخانقوا على ايديولوجياتكوا مش وقته والا والله العظيم تلاته التاريخ هيلعن سلسفين اللى جابوكم

لاننا لو مخرجناس وثورنا من جديد نموذج 54 هيتكرر تانى

واوعوا تفتكر ان الجيش المصرى زى السورى او الليبى جيشنا قسما بالله مفيش ظابط واحد من ظباطه هيقبل ان يضرب رصاص على اى متظاهرين

والجيش لم يمن علينا انه مقتلناش فى يناير و فبراير هو مقتلناش لان ده واجبه ولان الظباط رفضوا واحنا كنا مستعدين لنار الجيش وعندنا فاتورة دم مستعدين ندفعها

جمعة 27 لو منجحتش وكانت مليونيه يبقى قولوا ع الثورة يا رحمن يا رحيم

وفى الاخر هسيبكوا مع نكته بايخه

فى مرة واحد بيقول لمجلس عسكرى ...عندكوا معتقلين؟؟ قاله معندناش,,,وهو عنده جوة

أيها المجلس العسكرى : مبارك كان اشطر!

ليه خارجين يوم 27 ؟؟

ليه هنخرج يوم 27 مايو ؟
الصراحه احنا هنخرج يوم 27 مايو فى جميع ميادين مصر وميدان التحرير اصل هيئة الارصاد الجويه قالت ان الدنيا هتبقى ربيع والجو هيبقى بديع فى اليوم ده...
وكمان فى ناس هتروح التحرير فى اليوم ده لانها بقالها زمن مأكلتش وجبات كنتاكى
وفى ناس كمان جيوبها خرمانه وعايزة تقبض 100 دولار,الاخضر وحشها
وطبعا مش حقولكوا؟ فى ناس هايجه ع الاخر وعاوزة تمارس علاقات جنسيه كامله ! ماهو الممارسه هنلك فى الميدان فى الجو الطلق ده بتبقى لها متعه تانيه خالص.........
للأسف الكلام ده كله مجرد عينه من اللى هيتقال ع الشباب اللى هيزور الميدان يوم جمعة الغضب التانيه 27 مايو وبالفعل لو شفت البيان 56 للمجلس الاعلى وهو بيتكلم فيه عن القله المندسه والعناصر الخارجيه هتحس بقلبك وعقلك وكل جارحه فى جسمك انك بتشوف بيان للعادلى او لمبارك المخلوع
ثورة 25 يناير غيرت حاجه فى البلد؟؟ اه غيرت ,تحبوا اقولكوا ايه اللى اتغير
1- اسقاط دستور 71 الاله واستبداله باعلان دستورى اله اخر
2-اسقاط مبارك وبعض رموز النظام واستبداله بمجلس عسكرى شايف انه الاب الحنون الذى يجب ان يتخذ لنا القرارات دون نقاش وانه يجب ان يعمل فى صمت
3-سياسة مبارك(خليهم يتسلوا) اتغيرت وبقت هناك سياسة (خليهم يدردشوا)
4-كان الاول التغييرات واستصدار القوانيين بتتاخد وتمارس فى الخفاء ,حاليا استصدار القوانين تؤخذ وتعلن للعلن دون مشاورات وكأنها الوحى قد نزل بها
5-اعلام مبارك اسقط ليتحول من اعلام ينافق مبارك لاعلام ينافق المجلس العسكرى وشوفنا ده فى اللى حصل مع محمود مذيع قناة النيل للثقافيه وكمان لما مؤتمر الحوار الوطنى اتقطع و أحد شباب ائتلاف الثورة بيتكلم
6- شيلنا وحبسنا صفوت الشريف وعيينا سامى الشريف واعطيناله مقاليد حكم الاعلام
7-كان فى فتنه طائفيه سببها امن الدوله,بعد 25 احرقت اول كنيسه فى مصر منذ عمرو بن العاص وسببها(عدد ولا حرج)عادل لبيب,اسرائيل,سلفيين,فلول...ألخ
8- الشهاده لله اللى متغيرش هو قانون الطوارئ,لكن الحاجه الوحيده اللى اتغيرت فيه ان الاول مبارك كان بيعتقل الناس وخلاص لكن دلوقتى المدنيين بيتحاكموا محاكمات عسكريه واطفال لم يبلغوا ال18 يتحكم عليهم بالاعدام امام القضاء العسكرى متجاهلا قانون حماية الاطفال
فى حد فصيح هيقولى ده كله بسبب الثورة؟؟ هقولك ان ده كله بسبب ان الثورة قامت وخلعت مبارك وبعد كده راحت تلعب بى اس
المجلس العسكرى يدير البلاد على اساس ان ما حدث يوم 11 فبراير هو انقلاب وليس ثورة
اولا دعنى اوضح انى انتقد المجلس العسكرى بصفته الرئاسيه وليست بصفته العسكريه
ثانيا دعنا نفصل بين المجلس العسكرى وبين القوات المسلحه اللى فيها اخويا واخوك وابن عمك وابن خالتك
للاسف فى ناس دلوقتى بتلعن الثورة ومعاهم حق لو كان كل اللى بيحصل فى البلد ده سببه الثورة!!!!ا
لكن اللى بيحصل سببه ان اللى بيدير البلاد ليس يديرها بروح ثورة الخامس والعشرين
تجاوزات المجلس العسكرى:-
1-يوم 2 فبراير فى معركة الجمل اخد موقف حيادى سلبى وكأنه منتظر من يفوز ليقف بجانبه وساب شبابنا يتقتل والقناصه تصطادوا كأنه فريسه
2-فض التظاهرات السلميه بالقوة المفرطه يوم 9مارس و9 ابريل وتظاهرات السفارة الاسرائيليه
3- فى جمعة التطهير قبض ع ابراهيم كامل عشان يبقى كبش فدا وبعد كده اخلى سبيله لانه معرفش يلفقلوه تهمة الاستيلاء على مدرعات وعربات الجيش والاستيلاء على السلاح واقتحام ميدان التحرير وفض الاعتصام بقوه
4-دعنا ننحى موقفنا من التظاهر اما السفارة الصهيونيه ولكن ايا كان موقفك هل هذا يعطى الحق للشرطه التى يقولون لنا انها منهكه بان تضرب المتظاهرين السلميين بالرصاص؟؟ خاصة وانهم لم يقتحموا اى مكان,وكيف يقتحمونه والسفارة فى الدور ال11 فى عمارة ولها اسانسيرها الخاص بكود سرى وكل مطالبهم هى تنكيس العلم الصهيونى وعلى حد علمى انه اتنكس قبل كده فى حالات كتير
5-المجلس بيصدر قوانين غير عادله وكأنها أنزلت من السماء او وردت فى القران او الانجيل,فنفاجأة بقانون تجريم الاضرابات والاعتصامات المشروعه وقانون مباشرة الحقوق السياسيه العقيم ومنع 8 مليون مصرى بالخارج من التصويت وهم يدخلون لمصر عمله صعبه اكثر مما تدخله قناة السويس
6-يقوم المجلس بعمل حوارات وطنيه مع رموز لا تمثل الا الحزب الوطنى وبعض المنتفعين من رجال الاعمال
7-يتجاهل المجلس شباب الثورة ولا ينفذ اى طلبات لهم ويكتفى بان يسمع لهم ثم ودن من طين والاخرى من طين بردو
8-الحاج ممدوح شاهين بيقول ان الناس قالت نعم فى الاستفتاء للمجلس العسكرى على طريقة من قالوا نعم للدين لا يعلم ان من قال نعم ومن قال لا كان لمجر ان يتخلص من حكم العسكر
9-هناك حمله قامت لجمع 100 الف توقيه تطالب المجلس العسكرى بحكم البلاد وهى نفسها الطريقه التى استولى بها الجيش ع الحكم بعد ثورة 1952
10-الفتنه الطائفيه وحرق كنائس امبابه وعين شمس لم يتدخل الجيش والشرطه الا بعد ان احترقت الكنائس مع انه موجود قبل وقوع الحادثه فلماذا يقف موقف الحياد السلبى كما وقف يوم معركة الجمل ولماذا لا يفضها بقوة زى ما هو فالح يتشطر ع الاعتصامات الفئويه والسلميه والمتظاهرين ضد الصهيونيه
11-أزمة السولار واللى مسؤلين فى وزارة البترول اكدوا ان انتاجهم من السولار لم يقل ولكن نقله الا اماكن العمل قل ولا احد يعرف السبب,طب ما السولار موجود اهو,ليه مانعينه من السوق؟ولا عاوزين الناس تلعن ام الثورة وخلاص؟
12-واخرت المتمه لما نقول عاوزين نخرج لميدان التحرير يوم 27 يطلع بيان يقول اننا قله مندسه وعناصر خارجيه
13-تعرفوا ؟انا باكره اللى اسمه عمر عفيفى ده اوى وبجد والله لكن دلوقتى عاوزين يستخدموا فزاعه وكبش فدا على طريقة ابراهيم كامل كده وبعدين ايه حقيقة المكالمه اللى متسجله بينه وبين احد لواءات الجيش دى؟؟؟شخصيا ميهمنيش لكن اعرفوا ان زمن الفزاعات عدى ولى
لو انت مش هتخرج يوم 27 دى حرية شخصيه لكن انك تحشد لعدم الخروج دى قلة ادب
فى ناس عاوزة تعمل حاجه يا اما تتعاون معاها وتشجعها يا اما تقعد فى البيت ومتحبطهاش بحجج فارغه
وارجوا من الناس اللى قعدت فى البيت من يوم 25 لحد يوم 11 تتفرج ع التلفزيون يفضلوا قاعدين فى البيت ويقولوا رايهم بكل حريه لكن من غير اقصاء او تخوين او اسبعاد او دخول فى النوايا
فى الاخر نغمة تقديس وتأليه الجيش دى مش عارف على ايه,,هل المفروض نقول للمجلس متشكرين انك كنت تقدر تقتلنا ومقتلتناش؟؟؟
هو مقتلناش لان ده واجبه ووظيفته انه يحمينا وبيقبض مرتباته من جيوبنا ,,هو لم يمن علينا انه مقتلناش
وبما انهم بيقبضوا من جيوبنا احب اقولهم زى ما بعض الرأسماليين المتعفنيين اللى همهم يكسبوا وخلاص ,,خافوا على اكل عيشكوا و اعملوا بحرمة مرتباتكم
واوعوا تفتكروا ننا ممكن نبقى ليبيا او سوريا والله العظيم جيشنا وطنى جدا وظباطه كلهم اخواتنا ولا يمكن يضربوا رصاصه واحده على اى مدنى حتى لو صدرت الاوامر لهم بذلك,لكن فى نفس الوقت من حقنا ان ننتقد المجلس العسكرى بصفته الرئاسيه وليست العسكريه
هنخرج يوم 27 مايو الجاى ومطالبنا هى دى:-
1. تقديم مبارك للمحاكمة بتهمة الخيانة العظمى، على اثر اعتراف المشير بإعطاء مبارك الامر للقوات المسلحة بقتل المتظاهرين
2. اشراف قضائي وحقوقي على جهاز الامن الوطني ومحاكمة كل الضباط المتورطين في قتل المتظاهرين وتعذيبهم
3. حل جهاز الامن المركزي او ادماجه في الجيش
4. اقالة يحيى الجمل ومحاكمة عمر سليمان
5. وضع حد ادنى واقصى للاجور واعادة توزيع الثروات لانقاذ البلاد من الازمة الاقتصادية والتحكم في الاسعار
6. فرض الضريبة التصاعدية
7. محاكمة كافة رجال الاعمال الفاسدين ومصادرة اموالهم
8. الغاء احالة المدنيين الى قضاء عسكري
9. اعادة محاكمة كل المحكوم عليهم باحكام عسكرية بعد تحويلهم الى المحاكم المدنية
10. حظر فض الاعتصامات بالقوة بشكل كامل

ف الاخر نحب نقول للمجلس العسكرى عفوا لقد نفذ رصيدكم وعليكم اعادة المحاوله من جديد بعد اعادة الشحن